“RINDU BANDA SAPULUAH”

BAB 6

PAPI DIAK RAHMI TAPIKEK

KA ELOK PARANGAI BARLIAN

Episode (14)

Tapikek Ati Papinyo ka Parangai Barlian Nan Elok

Dek pitih bana nan alah sayuik, dek dompet bana nan alah tipih, batinggaan molah kamar kos nan lah diuni salamo satahun nangko. Bapisah elok-elok Barlian ka ibuk kos nan punyo rumah, baitulah adaik iduik nan ka dipakai. Untuang kok nasib elok isuak dapek kabatamu baliak.

Kutiko sudah sumbayang subuah, lah disampai-an kabanaran dek Barlian ka pangurus musalla untuak manumpang agak babarapo ari manjalang dapek aka. Nyatonyo kok kato iyo lai bajawek, kok gayuang iyo lai basambuik, satuju bana molah pangurus musalla dek caro azan jo bacaan alfatihah sarato bacaan ayat Barlian nan lai manyanangkan talingo jo ati nan mandanga. Dalam agak-agak, pamintaan Barlian ka manumpang di musalla manjalang dapek aka tu iyo saumpamo batamu bana rueh jo buku, saumpamo ladiang babaliak bana ka gagangnyo. Aratinyo iyo bana cocok jo bakasasuaian bana dek pangurus musalla. Dek karano itu, mulai siang nangko pindalah Barlian ka musalla nantun untuak manumpang tampek balinduang dari paneh sarato ujan.

***

Sasuai bana jo janji, siang tu Dik Rahmi sarato papi jo maminyo lah tibo di rumah kos Barlian. Dek untuang indak ka batamu, tanyato Barlian iyo alun lamo bana lai barangkek dari rumah kos tu. Iyo agak kecewa Dik Rahmi sarato papi jo maminyo kutiko tu. Iyo lah ilang aka Dik Rahmi jadinyo gara-gara Uda Barlian nantun. Apolai telepon Uda Barlian sadang mati pulo.

Dalam kaadaan ilang aka kutiko siang tu, tumbuah pulo nan bana dek Dik Rahmi untuak mangajak papi jo maminyo ka musalla manunaikan sumbayang zuhur. Kutiko ampia tibo ka musalla tadanga azan zuhur nan mandayu-dayu dari musalla dek papi jo mami Dik Rahmi nantun.

“Rahmi, nyaman sekali suara azan di Betawi ini,” kato papi Dik Rahmi nantun.

“Iya pi, tapi Rahmi rasanya kenal dengan suara azan itu. O iya pi, agaknya itu suara Uda Barlian yang kita cari itu,” kecek Dik Rahmi ka papinyo.

“Kalau yang azan itu benar Barlian, benar sekali dia perantau Minang yang tangguh. Sebab setahu papi, salah satu syarat bagi orang Minangkabau pergi merantau adalah pandai membaca alquran. Bagi orang Minangkabau, modal utama merantau harus pandai dan taat dalam agama. Selain itu, karena suaranya bagus, pastilah orangnya juga gagah,” sindia papinyo ka Si Rahmi nantun. Diak Rahmi bantuak senyum dikulum sajo mandanga sindia dek papinyo nantun.

***

Alah salasai sumbayang zuhur, papi jo mami manunggu di barando musalla, samantaro Dik Rahmi manjapuik Uda Barlian ka dakek mihrab. Indak lamo sasudah tu tibolah Barlian manyalami papi jo mami Dik Rahmi tando hormat.

“Assalamualaikum Papi, Mami!” kecek Barlian manyapo bak ka urang tuo surang sambia mancaliak ka Diak Rahmi.

“Alaikumsalam Nak Barlian!” baleh papi jo mami Si Rahmi tu.

“Informasi dari Rahmi, Barlian berasal dari Padang ya dan juga sarjana ekonomi ya?” tanyo papi Si Rahmi tu langsuang ka sasaran bantuak tanyo hakim sajo.

“Iya papi, tepatnya dari Bandar Sepuluh negeri seribu wisata pantai di ranah Minangkabau. Barlian dua tahun lalu sudah sarjana ekonomi, papi,” jawek Si Barlian. Papi jo mami tu agak takajuik dek mandanga alah sarjana nantun.

“Cocok sekali ini Mami,” kecek papi Dik Rahmi nan mambuek Uda Barlian salah tingkah. “Maksud papi adalah cocok sekali untuk mewujudkan rencana kita ke negeri seribu wisata pantai di ranah Minangkabau. Pastilah Barlian bisa dan bersedia memandu kita ke sana,” kecek papi Si Rahmi.

“Tapi ada satu syaratnya Pi,” kecek Dik Rahmi. “Papi harus menerima Uda Barlian dulu untuk bekerja di perusahaan Papi di Surabaya. Kalau sudah diterima, baru Rahmi izinkan Uda Barlian memandu papi dan mami berwisata ke Padang tersebut. Bukankah begitu Uda Barlian?” tanyo Dik Rahmi.

Uda Barlian maangguak tando setuju.

“Baiklah, kalau tentang permintaan tersebut tentu sangat mudahlah diatur. Bagaimana denganmu Barlian? Maukah bekerja di perusahaan Papi di Surabaya?” tanyo Papi Si Rahmi sacaro langsuang saroman tembakan duo baleh pas sajo. Uda Barlian tampaknyo maangguak tando lai suko.

“Oke selesai kan persoalannya. Ayo kita ajak dulu Barlian berwisata ke Taman Mini,” ajak papi Si Rahmi nantun. Barangkeklah ka ampek urang tu naiak oto untuak baputa-puta di Kota Jakarta nantun. (Bersambung}

[tribulant_slideshow gallery_id=”3″]

Be the first to comment

Leave a Reply

Alamat email Anda tidak akan dipublikasikan.


*