Episode (13)
Ratok Tangih Barlian, Bialah Rantau Dipajauah
Dari musajik, Barlian dalam baibo ati singgah subanta ka rumah kayu buruak punyo Etek Manih. Pasan agak saketek ditinggaan juo.
“Etek, iyo indak ka lamo Barlian di kampuang. Sabanta lai, bialah rantau Barlian pajauah. Malang bana nasib Barlian kini. Bialah cinto ka Nurlela, Barlian pacik arek, dipagang taguah. Kok indak dapek samaso gadih, baranak ampek ka Barlian nanti juo. Dek karano nan bakarano, bialah Barlian barangkek hanyo lai,” pintak Barlian ka Etek Manih.
“Barlian, Etek mintak, danga-danga juola Etek dari rantau yo Nak oi. Tumpak ka pado diri Etek, dek mujua lai sapanjang ari, kok malang tantulah sakijok mato. Ciek lai pintak Etek, sabalun maninggahan tanah kampuang, caliaklah juo kuburan Abak jo Amak,” pituah Etek Mani ka Barlian.
“Tantang parmintaan Etek nan kudian, pastilah doa jo sujuik Barlian lakukan ka kaburan Abak jo Amak. Tumpak kapado badan Barlian di tanah rantau, kito pakai adaik iduik di tanah rantau. Jampang kok indak ado kaba barito, tando Barlian salamaik di tanah rantau. Mohon izin Barlian untuak barangkek hanyo lai,” pintak Barlian jo aia mato jatua ka dalam.
***
Padiah bana ati Barlian nan mandorongnyo capek baliak maninggahan tanah Banda Sapuluah. Baju duo patagak di dalam tas untuak Nurlela, bialah dibaok baliak ka tanah Jawa. Bialah tiket kapatabang nan maha, bialah dompet nan samakin tipih, nan sakik ati nak mandorong Barlian capek babaliak ka tanah rantau supayo nak capek tibo di tanah Jawa. Apolai kalipik mato Barlian nan manggarik-garik sajak tadi nan samakin manjadi tando tanyo. Indak lamak parasaan jo kiro-kiro nan maantahan badan diri Barlian ka dalam kapatabang sarato nak capek maninggahan Bandara Minangkabau nantun.
Indak dicarito-an panjang bana, bia dipunta naknyo singkek. Lah turun Barlian dari kapatabang di tanah Banten, lah tibo Barlian lo baliak di tanah Jawa. Dipasan taksi dek Barlian untuak manuju ka rumah kos.
Tibo di rumah kos, hari lah malam, Barlian tamanuang dek duo pakaro iduik dari Ibuk kos sabanta nangko sahinggo manjadi tigo pakaro nan mambuek Barlian paniang-paniang lalek. Saumpamo Barlian indak taat ka ugamo, pastilah Barlian manggantuang diri di kamar kos nantun. Pakaro partamo dari ibuk kos adolah bahaso ari kapatang gudang tampek panyimpanan barang Barlian tabaka nan alah maanguih-an kasado barang, tamasuak kasadoalahe barang Barlian. Pakaro kaduo dari ibuk kos adolah bahaso pitih kontrakan kamar kos untuak sataun kamuko lah tibo masonyo untuak dibayia. Saumpamo indak ado piti, Barlian harus kalua dari rumah, sabab kalau indak babayia, ado urang lain nan ka masuak. Batambah tabiklah manuang Barlian sarato jatuah ka dalam aia mato. Dalam tamanuang-manuang surang takanalah pitua Abak maso dahulu bahaso lawik sati, rantau batuah.
Kutiko manghadapi pakaro iduik nan sulik tu tibolo pasan we-a di hape Barlian nan tanyato dari Dik Rahmi.
“Assalamualaikum Uda Barlian,” isi pasan Dik Rahmi.
“Alaikumsalam Dik,” jawek Barlian nan masih baibo ati surang diri.
“Bagaimana kabar Uda di kampung? Kapan Uda balik ke Jakarta?” tanyo Dik Rahmi nan sungguah sulik untuak dijawek Barlian.
“Uda sore tadi sudah sampai di Jakarta Dik,” jawek Barlian singkek sajo.
“Uda kok cepat sekali balik ke Jakarta. Agaknya ada masalah yang sedang Uda hadapi. Dik Rahmi yakin jika tak ada masalah di kampung pastilah Uda bersenang-senang dulu di Padang. Begini Uda, kebetulan Papi dan Mami sedang berlibur lebaran di Jakarta dari Surabaya. Besok siang kami mengajak Uda ya, kita liburan di Jakarta ini. Biar pikiran Uda bisa tenang,” kecek Dik Rahmi.
Barlian masih tatap tamanuang surang diri malam hari nantun mamikian baa caro iduik untuak maso ka datang. Raso-raso ka malu batamu jo kawan-kawan samo panggaleh di Pasa Tanah Abang ko. Taniek di hati Barlian mampajauah rantau, anta kok bisa nasib baiak di tanah rantau nan jauah tu saumpamo Kota Surabaya tampek asa Dik Rahmi tadi. (Bersambung)
Leave a Reply