“RINDU BANDA SAPULUH”

Episode (7)

Nurlela Mangaku Disasak-an Abak Balaki jo Karim

Kiniko malam manjalang lalok, Barlian mulai maunjua-unjuaan kaki di ateh kasua. Agak litak badan Barlian, anta litak dek manggaleh, anta litak dek manyantuang alias mamakan kolak nan tigo piriang. Indak lamo sasudah tu, Barlian mulai maukua kasua. Pangana Barlian mulai bacabang. Nan ciek bacabang ka Nurlela di Banda Sapuluah. Nan ciek lai bacabang ka Dik Rahmi nan di tanah Betawi ko.

Dek maraso salah karano kecek tadorong ka Nurlela pagi cako, salah jo maaf kadimintak ka Nurlela. “Apopun nan tajadi, hubungan silaturrahmi jo Nurlela indak buliah putui,” kato Barlian agak baujuang sangenek di dalam ati.

Hape dibukak, pasan we-a bakirim ka Nurlela untuak maminta maaf. We-a tabuka baruntuang bana pulo Nurlela sadang online.

“Diak Lela, Uda tadi pagi mangaku salah. Tangan Uda tadorong mangetik nan mambuek Lela tasingguang. Uda salah karano Uda sadang emosi. Jadi, pokoknyo Uda yo minta maaf bana ka Lela,” tulih Barlian langsuang bakirim ka we-a Lela.

“Uda jaan tadorong-todong juo mangecek. Kini, Uda alah Lela maafkan. Bisuak-bisuak Uda jaan bantuak itu juo lai. Tapi nan sabananyo Uda kan lai indak babini do kan?” tanyo Lela.

“Indak ado Uda babini do Lela. Kok babini pastilah Uda Tamburin ka mampakecek-an Uda kutiko pulang ka kampuang tu,” kecek Barlian bausao manyanang-an ati Lela.

“Ari rayo, Uda kan lai pulang ndak?” tanyo Nurlela.

“Lai Uda ka pulang. Pasan we-a Uda dulu ka hape Lela nan diambiak Abak Lela tu lah Uda sampaikan bahaso Uda tatap pulang walaupun harago tiket kapatabang maha. Uda tatap manamui Lela ari rayo. Uda alah mambalian baju rayo duo patagak untuak Lela. Rancana Uda ka pulang jo oto truk nan sopirnyo Uda Tamburin urang kampuang awak tu,” jawek Barlian jo panjang leba.

“Alhamdulillah kalau baitu Uda. Lela lah taragak bana jo paralu bana jo Uda. Kok dapek saminggu sabalun rayo Uda pulang,” mintak Nurlela.

Agak takajuik Barlian mambaco pamintaan Nurlela nantun. Tumbuah pulo ragu dalam kiro-kiro. Pasti ado masalah bana nan dihadapi Nurlela di kampuang. Tabiak pulo aka Barlian batanyo jo caro manguliliang.

“Lela baa kaba Si Karim nan kawan karib Uda tu? Iyo ka jadi anggota DPRD inyo di Banda Sapuluah?” tanyo Barlian maagak-agak.

Indak lamo pasan tu takirim, tampak Nurlela langsuang aktif mambaleh. Agak lamo Barlian manunggu. Ado pulo nan salah jo tanyo Barlian agaknyo. “Iko pasti naiak pulo spaning Lela baliak mah,” kecek Barlian dalam ati.

“Apo kecek Uda? Ko pasti Uda manuduah Lela ka balaki jo Uda Karim itu mah yo. Jan lamak bana Uda manuduah Lela ka balaki jo Uda Karim tu. Lah saminggu sakik kapalo Lela dek Uda mah. Abak Lela mah nan mamaso Lela balaki jo Uda Karim tu. Kecek abak, pitih abak alah banyak tapakai untuak mambuek spanduk jo baliho sarato biaya kampanye Uda Karim tu. Dek itulah Abak mamaso Lela balaki jo Uda Karim tu,” kecek Nurlela mambela diri walaupun Barlian indak ado manuduah.

Yo hebat caro Barlian untuak mambukak-an masalah apo nan tajadi di kampuang. Hanyo Barlian mananyoan kaadaan Si Karim, kawan arek lawan karehnyo, langsuang sajo Nurlela mambukak carito sandirinyo.

“Indak ado Uda manudua Lela ka balaki jo Karim do. Uda cuma batanyo kaadaan Karim sajonyo,” baleh Barlian.

“Iyo Uda samo jo manudua Lela mah. Lah sakik kapalo Lela dek Uda. Uda manudua Lela pulo bantuak itu. Lah bantuak bika tajarang nan dikapik api baro di Koto Baru tu Lela jadinyo mah. Di ateh baro, di bawah api baro pulo,” kecek Nurlela mambela diri.

“Iyolah, Uda indak ado manudua Lela do. Tapi kok iyo Lela balaki dek dipaso Abak Lela, tantu iyo indak dapek aka Uda lai,” baleh Barlian di we-a tu.

Langsuang dibaleh Nurlela. Agaknyo Nurlela mulai emosi.

“Apo kecek Uda? Tampaknyo Uda mulai mailak jo Lela mah. Uda mulai mancari ilik-ilik tampaknyo mah. Kok bantuak iko, bararti iyo Uda lah punyo urang Batawi tu pangganti Lela ma yo. Bialah Lela bunuah diri sajo lai ko bantuak iko,” kecek Lela di pasan we-a tu.

Indak lamo sasudah tu, langsuang pulo dimatikan hapenyo. Manjadi paniang pulo kapalo Barlian jadinyo. Kok iyo Lela bunuah diri di kampuang iyo indak dapek aka Barlian lai. Malam kini indak namuah lalok mato Barlian mamikian apo nan ka tajadi dek diri Nurlela di Banda Sapuluh. (Bersambung)

Previous Image
Next Image

info heading

info content

Be the first to comment

Leave a Reply

Alamat email Anda tidak akan dipublikasikan.


*