
Episode (11)
Wakatu Manikah Makin Dakek, Nurlela Manangih Dipaluak Amaknyo
Informasi tantang kapulangan Uda Barlian makin kabua. Apolai Nurlela lah dijauah-an dari sagalo macam hape dek Abaknyo sahinggo indak ado lai komunikasi jo Barlian. Walaupun urang rantau Banda Sapuluah lah samakin banyak tibo di kampuang, tapi informasi tantang truk Uda Tamburin nan ditumpangi Uda Barlian alun juo ado kaba baritonyo.
Ari-ari dilalui Nurlela hanyo jo caro bakuruang diri di dalam biliak. Pancaliak-an lah samakin lindok; badannyo lah samakin kurui. Nasi tamakan indak tamakan. Nasi dimakan lah raso sakam; aia diminum lah raso duri. Tinggalah arok nan jo cameh. Cinto nan ka Uda Barlian ka babaok mati; cinto nan kaindak batulihan di buku nikah.
Tapek bana Abak jo Amaknyo pulang dari sumbahyang tarwiah, Nurlela marambok sarato mangaja Amaknyo di ruang tangah. Dipaguiklah Amaknyo kuek-kuek dek Nurlela sarato manangih manyasali iduiknyo. Abak Nurlela mancari tampek duduak di kurisi ruang tangah tu.
“Amak kok jo iko nasib Nurlela, raso indak ka ado gunonyo iduik lai Amak oi. Mangalah Abak mamasoan cinto Lela ka Uda Karim itu Amak ai. Indak tabayang apolah nan ka tajadi dek Nurlela katiko isuak barumah tanggo jo laki nan indak Lela cintoi tu Amak ai,” tangih Nurlela sambia mamaguik Amaknyo kuek-kuek. Aia mato Nurlela tabuang sio-sio. Abak Nurlela tadiam jo sarato mancubo manahan emosi.
“Lela, bukanlah Amak indak mambela kau anak kanduang oi. Tapi apo nan diparintah-an Abak tu banyak gunonyo. Iduik di dunia ko banyak karamaik. Kadang-kadang nan kito bayang-an kini iduik isuak ka susah, tapi nyatonyo isuak iduk lai sanang. Kadang-kadang nan kito bayang-an kini iduik isuak ka sanang, tapi nyatonyo isuak iduik tu malah susah. Picayolah ka Amak, nak Lela oi,” pituah Amaknyo ka Nurlela sambiah mamaguik anaknyo Nurlela jo kasiah sayang.
“Amak, tapi indak ka mungkin Lela manikah jo Uda Karim tu. Indak ka mungkin Lela bisa iduik jo Uda Karim tu isuak do Amak ai,” kecek Nurlela dalam tangih nan indak tatahan.
“Cubolah lah dulu manikah isuak Nak Lela oi,” kecek Amak Lela mambujuak Lela.
“Amak, indak mungkin manikah jo caro cubo-cubo doh Amak oi,” ratok Nurlela.
Mandanga kecek Nurlela tu, indak tahanlah ati Abaknyo. Muncuangnyo mangaretek sarato tangannyo manggarik-garik manahan emosi.
“Lela, isuak jaan kau pamalu-an Abak di muko urang banyak. Bulan puaso tingga babarapo ari lai. Janji lah dibuek arek nan indak ka bisa diungkai lai. Ari kaampek ari rayo, panikahan kau jo Si Karim indak bisa dibatal-an lai. Apolai parnikahan kau jo Si Karim lah disatujui dek Mamak kau Angku Kulin. Kalau kau Lela indak patuah lai jo Abak kau ko, kau ambiak kartu keluarga tu kini juo, kau coret namo kau di dalam kartu keluarga tu. Barangkeklah kau kini juo dari ateh rumah ko,” kecek Abak Nurlela nan lah mulai naiak darah sambia tagak sarato barasak ka dalam biliak.
Mandanga kecek Abak tu, tambah pacahlah tangih Nurlela malam ari tu. Makin dipaguik areklah Nurlela dek Amaknyo. Abihlah sudah sagalo usao Nurlela salain hanyo manarimo pamintaan Abaknyo. (Bersambung)
Leave a Reply