
Episode (10)
Sadang Bapikia Pulang, We-a Diak Rahmi Tibo
Saumpamo lai lah jua bali Uda Barlian sajak babarapo ari nan lah lalu sampai ari kiniko. Apolai ari kiniko, sadang basasak bana jua bali di kaki limo ko. Indak putui-putui urang babalanjo sajak pagi hinggo patang. Ikolah nan lai manggadang-an ati Barlian sangenek untuak mailang-an suntuak jo rusuah ati tantang Diak Nurlela di Banda Sapuluah.
Dek ari nan lah mulai patang jo pasa nan lah mulai langang, diberes-an sagalo barang kaki limo masuak kardus, diikek arek sarato bamasuak-an ka gudang. Ikolah tando bahaso kadai kaki limo ka ditutuik Barlian agak lamo sampai wakatu nan alun dapek ditantu-an. Pulang ka kampuang labiah diutamo-an untuak rayo sarato bajuang untuak mandapek-an Diak Nurlela sacaro layia nan sadang dirabuik dek Karim nan sadang mangguntiang dalam lipatan nantun.
***
Di kamar kos nan saumpamo dihimpik dek gedung-gedung puluhan lantai nan manjulang tinggi tu, malam kini ko Barlian lah sudah sumbayang tarawih sarato jo witir. Lah disaratoan pulo jo mambaco babarapo halaman alquran saroman nan diingek-an bana dek Amak Barlian wakatu iduik dulu.
Tas nan ka dibaok isuak ka kampuang alah pulo bakamehan dek Barlian. Baju Nurlela nan duo patagak bapantang balupoan. Sarawa lepis agak duo alai alah pulo bamasuk-an ka dalam tas nantun. Itu paralu bana dek Barlian sabab walau baa bana ka susah iduik di rantau, panampilan nan rapi mamakai sarawa lepis iyo paralu ditunjuak-an juo ka urang kampuang. Itu paralu bana untuak mangurangi jumlah urang kampuang nan ka mampakecek-an urang rantau saroman Barlian nan iduik pulang dalam kasusahan. Pituah abaknyo itulah nan diingek bana dek Barlian sampai kini.
Dek ari lah barimbang malam juo saumpamo siang baabih wakatu, saumpamo malam baabih minyak, tiboloh wakatunyo Barlian maunjua-unjuaan kaki, sarato badan maukua tampek lalok. Indak lamo sasudah nantun, saumpamo Barlian sadang lalok-lalok ayam, badariang bunyi hape tando pasan we-a nan lah masuak.
Mandanga hape badariang, badabok sarato takajuik darah di dado. Untuang kok lai pasan we-a dari Diak Nurlela nan dakek di ati, nan jauah di mato. Kok indak dari Nurlela tandonyo ka bapisah indak bisa diambek lai, patando Abak Nurlela lah nan bakuaso. Bialah cinto ka Nurlela dibaok mati.
“Assalamualaikum Uda Barlian. Ini Dek Rahmi Uda. Mohon maaf ya Uda, Dek Rahmi mungkin mengganggu waktu istirahat Uda. Sesuai dengan janji Dek Rahmi beberapa minggu lalu, Dek Rahmi besok-besok mohon bantuan Uda untuk wawancara. Maksud Dek Rahmi ya sudah lebaran saja Uda,” bunyi pasan we-a dari Dek Rahmi nan rupo mukonyo saroman Nurlela di Banda Sapuluah tu.
“Baiklah Dek Rahmi. Uda siap untuk membantu penelitian skripsi Dek Rahmi tersebut. Ngomong-ngomong penelitian Dek Rahmi berupa penelitian kualitatif ya?” baleh Barlian sesuai naluri kasarjanaannya di jurusan ekonomi.
“Uda Barlian, maaf ya Uda kalau anggapan Adek salah. Dek Rahmi berpikir Uda Barlian pasti sarjana ya? Uda pasti sarjana ekonomi ya atau setidaknya sarjana bidang ilmu sosial humaniora ya? Waktu Dek Rahmi berbelanja dengan Uda dulu, insting Dek Rahmi menyatakan Uda adalah sarjana. Benarkan Uda?” tanyo Dek Rahmi ka Uda Barlian.
“Benar Dek Rahmi. Uda sarjana ekonomi dari universitas di Padang. Cuma nasib baik belum berpihak pada diri Uda di negeri rantau ini,” baleh Barlian.
“Uda janganlah berputus asa begitu. Dek Rahmi benar-benar salut dengan Uda apalagi waktu Dek Rahmi berbelanja dulu, salat Uda tidak ketinggalan dan juga rajin membaca Alquran walaupun di sela-sela waktu berjualan. Sosok lelaki seperti Uda inilah yang Dek Rahmi idam-idamkan selama ini, Uda. Baiklah Uda, mohon maaf karena sudah mengganggu waktu istirahat Uda malam ini. Nanti sesudah lebaran Dek Rahmi wawancara untuk mengumpulkan data penelitian tersebut ya Uda. Selamat tidur Uda Barlian,” tulih Dek Rahmi di pasan we-a nantun.
Diulang-ulang mambaco pasan we-a Dek Rahmi nan kudian nantun. Satiok diulang mambaco, samakin badabok darah di dado. Dipikia-pikia bana mukasuik kalimat Dek Rahmi nan babunyi “sosok lelaki seperti Uda inilah yang Dek Rahmi idam-idamkan selama ini” nantun. Samakin dipikiakan mukasuiknyo samakin badabok darah di dado. Dek lamo dek bapikia, sudah tu Barlian takalok juo.
Leave a Reply