BAB 4
NURLELA DIPASO NIKAH JO KARIM
Episode (8)
Nurlela Dipaso Abaknyo Manikah jo Karim
Kutiko Nurlela sadang paniang-paniang lalek di Banda Sapuluah untuak mamikian hubungannyo jo Barlian nan sadang takatuang-katuang bak biduak abis minyak di tangah lawik, tiboloh pakaro baru dari Abaknyo. Pakaro baru tu adolah Abak Lela ka mamaso Nurlela untuak manikah jo Si Karim. Curito tu lah disampaian dek Amaknyo ka Nurlela babarapo ari nan lalu. Kini Abaknyo tingga manunggu wakatu nan tapek untuak manyampaiannyo ka Nurlela.
Kiniko wakatu ka rayo lah tingga babarapo ari lai. Dek karano itu, Nurlela paham bana bahaso Abaknyo pasti sajo lamo jo lambek kamanyampaiannyo ka Nurlela untuak manikah jo Karim. Kiniko Nurlela dalam kaadaan tadasak nan indak bisa ka mailak lai. Walau nan sabananyo bana, Nurlela indak punyo ati saketek juo ka Si Karim tu.
“Baa pulolah rumah tanggo bisuak ka jadinyo sadang-an awak indak cinto saketek pun juo ka Uda Karim tu,” kecek Nurlela nan sadang paniang-paniang lalek nantun dalam ati.
Kutiko malam sudah babuko, langsuang Abaknyo mangatoan bahaso ado nan kadikecek-an ka Nurlela. Langsuang tamanuang Nurlela agak lamo jo mancaliak Amaknyo sambia baibo ati jo saroman jatua ka dalam aia mato.
“Lela, ado paralu bana nan ka Abak sampaian. Tantang pakaro nan ka Abak sampaian ko, Lela indak bisa mailak. Lela arus patua ka Abak nan gunonyo iyo untuak kasanangan iduik Lela barumah tanggo isuak,” kato Abak Lela.
“Lela alun ka balaki lai Bak!” jawek Lela.
“Indak buliah Lela mengecek saroman nantun. Adaik anak gadih dikaja umua nak kanduang oi. Manyasa salamo iduik Lela bisuak nan Abak jo Amak camehan. Apo nan Abak jo Amak pikiaan ko samato-mato untuak kasanangan iduik Lela isuak. Kami orang tuo nan alah lamo makan garam kahidupan ko, tantu batangguang jawab untuak mamiliahan kasanangan iduik maso depan anak-anaknyo. Lai paham Lela jo mukasuik Abak jo Amak tu?” jaleh Abak Lela.
“Lai Bak,” jawek Lela dalam wakatu tadasak nan ka indak bisa maelak lai. Samantaro ati alun bisa manarimo Karim saketek juo, sadangkan cinto masih tasangkuik ka Uda Barlian di tanah rantau.
“Jadi, mulai sajak kini, jaan Lela pikiaan juo lai Si Barlian nan alun jaleh kadudukan jo jabatannyo. Dek karano itu, Abak jo Amak manyuruah Lela balaki jo Si Karim nan alah jaleh jabatannyo isuak sabagai anggota DPRD di Banda Sapuluah ko. Aratinyo paralu Lela inok-inok-an bahaso Allah lah manatapan jodoh Lela jo Karim nantun, bukan jo Barlian. Masalah urusan jo mamak-mamak Lela, nan utamo jo Angku Kulin itu adolah urusan abak. Rasonyo maso kini di Banda Sapuluah ko, masalah urusan jodoh anak adolah urusan Abaknyo. Biasonyo mamak lah cukuik manyatujuinyo sajo,” jaleh Abak Lela.
“Tapi ati Lela alun bisa manarimo Uda Karim seketek juo lai Bak,” jawek Lela sambia mamikian hubungannyo jo Uda Barlian.
“Lela, pakaro ati tu, Lela pasti bisa maumbuak-umbuak ati Lela tu ka Uda Karim. Lamo jo lambek cinto Lela ka Uda Karim pasti tumbuah. Picayolah ka Abak jo Amak ko. Kami juo bantuak itu zaman saisuak dulunyo,” jaleh Abak Lela.
Mandanga pituah Abak tu, tamanuanglah Lela sambia jatua ka dalam aia mato. Amak Lela langsuang mamacik arek Lela jo kasiah sayang nan batinnyo mandorong Lela satuju jo parintah Abaknyo. (Bersambung)
Leave a Reply