“RINDU BANDA SAPULUAH”

BAB 5

NURLELA MANIKAH, RANTAU DIPAJAUAH BARLIAN

Episode (12)

Nikah Salasai, Barlian Tibo

Malang bana pajalanan Barlian jo Uda Tamburin. Antrian truk naiak kapa feri di Palabuhan Merak manuju Pqlabuhan Bakauhuni bantuak ula gadang bakelok-kelok nan indak putui. Oto truk Uda Tamburin alah antri di paliang ujung. Indak lamo sasudah tu lah tibo pulo oto truk nan sambuang-manyambuang sahinggo lah takapik oto Uda Tamburin. Iyo indak dapek aka Barlian jo Uda Tamburin lai. Samantaro duo ari lai lah tibo rayo. Kaba buruak untuak sopir truk lah tibo pulo bahaso oto truk baru buliah manyubarang ka Pelabuhan Bekauhuni pado ari rayo partamo. Samakin putuilah harapan Barlian, ragu tibo bahaso indak ka mungkin lai batamu jo Nurlela sabalun nikah. Abihlah sagalo dayo jo upayo. Manyarahlah Barlian ka nan satu.

***

Sanjo di ari rayo kaduo, barulah oto truk Uda Tamburin kalua dari kapa veri, masuak ka tanah tapi pulau Sumatra. Mancaliak jalan oto truk Uda Tamburin nan bainsuik-insuik dek barek baban, saroman baban oto itu pulolah bareknyo pikiran Barlian. Indak ka mungkin Barlian jo Uda Tamburin tibo sabalun ari kaampek rayo di Banda Sapuluah. Aratinyo untuak ka bisa mahalangi panikahan Nurlela jo Karim, iyolah ka sio-sio sajo dalam agak-agaknyo.

Kini Kota Lampung lah ditinggahan, Tabiang Tinggi lah lamo dilalui sarato ampiang tibo di Lahat. Lah lamo sasudah nantun, oto dibaok ka tapi dek Uda Tamburin mandakek ka rumah makan. Subuah lah tibo di ari katigo, tapeknyo baranti di Sarolangun Bangko. Sumbayang subuah lah salasai dek Barlian jo Uda Tamburin. Oto barangkek hanyo lai, gigi masuak roda babeliang, kisah bakisah kabuik di balakang.

Jarum jam puta baputa, siang abih baganti malam. Malam abih subuah lah tibo, tapek bana di ari kaampek ari rayo. Oto lah masuak di bateh Banda Sapuluah. Oto marapek ka rumah makan. Sumbahyang subuah capek dikarajoan dek Barlian jo Uda Tamburin.

Indak lamo sasudah nantun. Oto barangkek hanyo lai, andak manuju ka kampuang Barlian. Bukik Langkisau lah ditinggahan sarato pulo jo Bukik Pulai. Nan minit baganti minit, nan jam lah baganti jam. Oto marangkak tarui juo sarato lah masuak ka kampuang Barlian.

Oto Baranti di muko musajik, indak jauah dari rumah Nurlela. Urang rami darah Badabok. Barlian malompek tarui ka musajik, nikah tanyato alah salasai.

“Nurlela…,” pakiak Barlian baibo ati di pintu musajik.

Kutiko andak mangaja Barlian, Nurlela dipacik arek dek Uda Karim. Abak Nurlela bijak jo maklum tantang itu, nyo capek malangkah manuruik Si Barlian.

“Barlian, danga-an mola kato Abak. Nurlela kini alah manjadi bini dek Si Karim. Dek karano itu, Nurlela ndak usah digaduah juo, ndak usah diagiah arok juo. Sakali lai supayo Nak Barlian manggarati jo adat, ingeklah Nurlela kini adolah bini dek Si Karim. Elok tinggahan kampuang ko kini juo,” kecek Abak Nurlela mulai lantang.

“Baa kok co iko bana, sikap Abak ka Barlian?” tanyo Barlian ka Abak Nurlela.

“Barlian. Indak usah pakaro ko dipapanjang. Asah waang tau sajo, sakik ati waang tu, alah den alami wakatu saisuak kutiko den indak jadi mampabini urang padusi nan den cinto. Aden dilarang mampabininyo dek lah dicarian laki dek abaknyo. Sampai kini sakik ati den indak bisa ilang,” kecek Abak Nurlela sarato jo naiak darah.

“Jadi sakik ati Abak zaman saisuak ka urang tu, Abak baleh-an ka Barlian wakatu kiniko?” tanyo Barlian.

“Iyo, sabab urang padusi nan denai cinto iyolah Amak waang tu nan dihalangi dek kakek waang katiko tu,” jawek Abak Nurlela.

Mandanga jawek Abak Nurlela, takajuiklah Barlian bantuak mandanga patuih tangah ari. Malu jo malang bacampuah di dalam diri Barlian. Barangkek Barlian maninggahan musajik, sadang bagalanggang mato urang banyak. Indak ado malu nan samalu nangko. Malu ka mano ka disuruak-an. Kampuang ka ditinggahan Barlian hanyo lai. Rantau dipajauah hanyo lai. (Bersambung)

Previous Image
Next Image

info heading

info content

Be the first to comment

Leave a Reply

Alamat email Anda tidak akan dipublikasikan.


*