“RINDU BANDA SAPULUAH”

BAB 1

RINDU BARLIAN KA NURLELA

Episode (1)

Surek Uda Barlian untuak Diak Lela di Kampuang Banda Sapuluh, Tanah Minangkabau

Assalamualaikum warahmatullahi wabarakatuh,

Talabiah dahulu Uda Barlian sampaikan ka Diak Lela bahasonyo kaadaan Uda di tanah Jawa kecek rang kampuang, kini iyo agak damam paneh. Panyabab damam paneh Uda indak lain indak bukan dek mamikia-an tiket kapatabang pepe (pulang pai) nan maha bana untuak pulang ka kampuang pado wakatu hari rayo isuak. Namun samantang pun baitu, rindu Uda ka Diak Lela indak paralu bana Lela ragu-an. Bapatui pun nagariko, Uda tatap pulang dan alah batekad tatap untuak manamui Diak Lela di hari rayo isuak. Agak ka malam lebaran pun Uda sampai di kampuang, Uda tatap bausaho.

Tantang karajo Uda di tanah rantau, paralu baliak Uda sampai-an bantuak nan Uda sampai-an salamoko malalui we-a, bahasonyo satahun balakang ko Uda masih manggaleh barupo galeh kaki limo, tapi Uda raso-an usaho kaki limo kini memang agak payah. Mungkin dek ekonomi tu bana nan manurun. Nan takana loh dek Uda, kiriman paket pulsa ka nomor hape Diak Lela lai masuak kan? Uda sangajo diam-diam mangirim tando cinto Uda nan indak putui ka Diak Lela.

Usaho galeh kaki limo ko adolah usaho Uda sambilan tapi salamo satahun tu pulo Uda lah maantah-an ijazah ka kantua demi kantua untuak malamar karajo. Nyatonyo, nasib baiak alun bapihak ka Uda. Alun juo batamu rueh jo buku. Uda tatap basabah sampai kini. Yakinlah awak bahaso urang saba pasti dikasihi sarato disayangi Allah.

Karano itu pulo, walaupun Uda alun dapek karajo kantua dan masih tatap karajo galeh kaki limo, Uda mintak cinto Diak Lela jaan baraliah ka nan lain. Karano itulah foto-foto Uda di tanah rantau tatap Uda kirim malalui we-a tando cinto Uda nan indak putui ka Diak Lela. Randang nan Diak Lela buek-an wakatu Uda barangkek marantau dulu jauah labiah lamak dari nasi nan Uda bali di tanah rantau ko. Karano itulah, cinto Uda ka randang, mukasuik Uda cinto Uda ka Diak Lela, indak bisa diganti jo padusi nan lain.

Tapi babarapo bulan kapatang Uda agak kecewa dek indak ado Diak Lela mangirim foto ka we-a Uda lai, makonyo Uda kirim-an paket pulsa nantun. Untuak babarapo hari ka muko, kok dapek kirimlah foto-foto Diak Lela untuak maubek raso rindu Uda ka Diak Lela.

Babaliak ka rancana pulang Uda, kini Uda alah batekad untuak pulang pado wakatu hari rayo isuak. Tandonyo adolah Uda lah mambalian baju rancak duo patagak untuak Diak Lela nan bisa Diak Lela panggak-an tando Diak Lela punyo Uda nan sadang marantau di Tanah Jawa.

Kalau Uda etong-etong tiket kapatabang tu tatap maha, Uda tatap pulang manumpang jo oto truk nan sopirnyo Uda Tamburin lai urang kampuang kito juo. Uda lah bajanji ka manumpang jo Uda Tamburin nan dipakiro-an samalam manjalang hari rayo alah sampai di kampuang. Itu Uda laku-an untuak manjago cinto kito indak putui. Sabab Uda takuik, kalau indak pulang tantu Diak Lela, cinto Uda disemba pulo dek kawan-kawan Uda di kampuang karano tantu Amak Diak Lela tatap manyasak-an Diak Lela untuak capek balaki. Sagitu sajo daulu dari Uda.

Dari Tanah Rantau
Udamu nan salalu marindu-an,

Barlian Koto

NB (aratinyo Uda indak tau loh do): Kalau Diak Lela lai indak banyak karajo, balelah we-a Uda ko. Buliah lapehloh taragak Uda di tanah rantau. (Bersambung)