“RINDU BANDA SAPULUAH”

BAB 3

TABIK RAGU NURLELA KA UDA BARLIAN

Episode (5)

Pasan We-a Nurlela Nan Tibo-tibo

Sajak sahari nangko, lah mulai sanang bana hati Barlian. Apolai taraso bana aura Diak Rahmi pagi tadi bapangaruah bana ka untuang jua bali Barlian sahari tadi. Dalam agak-agak Barlian, kahadiran Diak Rahmi tadi pagi mambaok kabaruntuangan dalam iduik. Makonyo kok lai saroman untuang jua bali galeh tadi satiok ari, iyo lai ka bisa maubah iduik untuak salanjuiknyo. Itu nan tabayang-bayang dek Barlian.

Malam kini, Barlian lah sudah sumbayang tarawiah. Lah ditutuikloh jo mambaco quran babarapo halaman. Sambia manonton tivi di kamar kos nan ketek tu, lah mulailoh badan Barlian maukua kasua. Sanang bana ati Barlian nan indak takiro. Tacaliak juo baju Nurlela duo patagak nan digantuang di dindiang. Takana-kana pulo sosok Nurlela nan manutuik bayang-bayang Diak Rahmi.

“Ah ndak paralu diambiak pusiang bana. Ibaraik urang mamikek balam, dipasang sajolah jarek agak duo. Dalam jarek nan duo, tantulah diarok tajarek balam agak ciek,” kecek Barlian dalam ati mulai badamai jo maumbuak-umbuak ati nan sadang galau nantun.

Dalam kaadaan pangana Barlian nan talayang-layang, badariang loh bunyi pasan we-a tando masuak. Badaboklah dara di dado. Tabayang sakali pasan we-a Diak Rahmi nan kamambao kabaruntuangan dalam iduik Barlian. Dalam arok, capek-capek dibukak pasan we-a di hape nantun. Eeh tanyato pasan we-a ko dari nomor indak dikenal pulo. Amba pulo baliak kaji jadinyo. Dibukak juolah pasan we-a tu dek Barlian.

“Uda Barlian. Iko dari Lela Uda,” baitu tatulih nan dibaco Barlian.

Tampak nomor we-a tu sadang aktif bana dari Banda Sapuluah. Agak tabiklah mangka Barlian. Naiakloh suga Barlian. Berangnyo mulai naiak manuju ubun-ubun.

“Baa kok lah duo minggu pasan we-a Uda indak Lela baleh. Iko nomor we-a siapo pulo ko nan Lela pakai,” baleh Barlian di we-a tu bantuak manuduah jo saketek emosi.

“Uda Barlian. Iko hape adiak Lela nan Lela pakai. Hape Lela lah hampia sabulan diambiak dek ayah. Baa kok Uda sumbarang tuduah nan bantuak itu. Atau Uda nan lah mulai mailak dari Lela. Dalam angguak, Uda lah mulai manggeliang-an. Dalam iyo, Uda lah mulai maindak-an,” bunyi baleh pasan we-a Nurlela dari Banda Sapuluah.

Agak tamanuang lamo Barlian dek mambaco pasan we-a nantun. Takanaloh dek Barlian pasan jo ajaran-ajaran lamo nan disampai-an ayah kanduang wakatu iduik.

“Harus maklum Nak, katiko awak sabagai urang laki-laki bahadapan jo urang padusi. Sipaik urang padusi pantang daulu dituduah urang laki-laki. Kok dapek urang padusi harus labiah dahulu manuduah awak sabagai urang laki-laki,” itu pasan ayah nan tangiang-ngiang dek Barlian.

Dicaliakloh baliak we-a dek Barlian. Tanyato Nurlela sadang mangetik pasan. Badabokloh darah di dado. Dalam agak-agak sipaik urang padusi, pastilah Nurlela manambah tuduhan nan kaduo. Itu dalam parasaan Barlian.

“Atau mungkin sajo di tanah Betawi tu, Uda Barlian lah dapek gadih subarang tu untuak pangganti Lela dek Uda. Mangkonyo Uda manuduah Lela jo sumbarang tuduah bantuak itu supayo ado alasan bagi Uda maningga-an Lela. Mungkin sajo nasi uduak tu lah jauh labiah lamak dari randang dek Uda yo,” bunyi pasan tambahan saumpamo urang main bola mamakai tembak-an duo baleh pas walau pasan sabalunnyo alun sempat dibaleh Barlian.

Tamanuang panjang Barlian dek tuduhan demi tuduhan nan dialamat-an ka badan diri. Takanaloh ajaran baiak dari ayah kanduang daulunyo.

“Nak Barlian, kok isuak ka mulai barumah tanggo. Harus mamahami bana adaik jo paraturan hubungan urang laki-laki jo urang padusi,” kato Ayah Barlian suatu katiko nan masih takana. “Dalam iduik kito, urang padusi tu alah mambuek adaik jo paraturan tu sacaro sapihak nan indak bisa dibantah lai dek urang laki-laki nan hanyo duo pasal sajo. Indak labiah indak kurang. Pasal partamo, urang padusi salalu bana, indak pernah salah. Pasal kaduo, kalau urang padusi salah harus babaliak ka pasal partamo. Indak ado pasal baru atau pasal tambahan. Titik lah sagadang buah karambia tando indak bisa lai ditambah.”

Sadang Barlian maingek-ingek ajaran ayah tu, alun sempat mambaleh pasan, tibo loh baliak pasan salanjuiknyo dari Nurlela.

“Baa indak Uda baleh. Baarti iyo tu bahaso Uda lah dapek gadih Batawi pangganti Lela,” tulih Nurlela di we-a tuh.

Kini batambah sakik kapalo Barlian mambaco tuduhan nan banyak tu. Indak sempat lai Barlian mananyoan tantang Si Karim tu. Nyo ambiak baliak hape nan baru sajo dilatak-an, langsuang nyo mati-an dek Barlian. Nyo pupuah lalok di kasua dalam kaadaan sakik kapalo nantun. Anta lai kabisa lalok anta indak badan Barlian. (Bersambung)

325 Total Dibaca 2 Dibaca hari ini
Share

Komentar

Previous Image
Next Image

info heading

info content

Be the first to comment

Leave a Reply

Alamat email Anda tidak akan dipublikasikan.


*