“RINDU BANDA SAPULUAH”

Episode (4)

Maukua-ukua Diri, Maetong-etong Si Karim

“Baa bana ka susah iduik Nak, nan sumbayang jaan ditingga-an, nan quran sabuah jaan jauah dari diri. Mambaco quran diluang-an juo agak sabanta.” Pituah mande tu disampai-an duo bulan jalang kamaningga tatap tangiang-ngiang tarui dalam pikiran Barlian. Pituah Mande tu tatap dipacik arek, dipagang taguah dek Barlian.

Kini lah sudah Barlian sumbayang subuah, lah dibacoloh quran babarapo halaman. Itulah pamintaan Mandeh kanduang sabalun aja. Pamintaan nan dipagang taguah dipacik arek. Dikana iduik di dunia, ka akhirat juo nan ujuangnyo.

Subuah sudah, matoari tabik. Manyandalah badan Barlian surang diri. Kamar kos nan di balakang gedung-gedung metropolitan taraso langang. Dicaliak juo baju Nurlela duo patagak nan digantuang di dindiang. Makin dicaliak baju tagantuang, makin tabayang juo Nurlela di Banda Sapuluah. Sairiang nan jo nantun, makin tabiklo suga sarato jo sakik hati Barlian ka Si Karim. Samakin ramuaklah hati jo dado.

Dalam kaadaan arok-arok cameh, basarato ragu dalam diri Barlian, lah diagak-agak ukua jo jangko, dek alah saminggu labiah jo kurang, lah patuiklo Nurlela di we-a agak sakali lai. Agak manggaretek juo tangan Barlian manulih pasan di we-a dek ado ragu indak kadibaleh juo.

“Diak Lela… Diak Lela….,” tulih Barlian.

Ditunggu agak subanta. Centang itam masih ciek. Indak lamo lah barubah manjadi centang itam duo buah. Gadang ati Barlian indak dapek takato-an. Cinto Nurlela lai alun barubah. Janji sataun lalu lai dipacik arek dipagang taguah.

Lah tibo agak jo jangko. Lah taraso-raso agak lamo. Ditunggu alah ditunggu, nan centang itam duo indak juo barubah manjadi centang ijau langik. Mulai ilang sumangek Barlian. Iko lah batua bana barito Udah Tamburin nan sopir truk tu. Nurlela lah pasti maubah cinto. Itulah nan tabaco-baco dalam ati Si Barlian surang diri.

“Kok coiko, banalah kironyo Si Karim adolah musuah dalam salimuik. Nurlela lah mangubah cinto. Mantang-mantangnyo sadang naiak daun. Lah ilang raso jo pareso, lah ilang raso tenggang-manenggang dalam dirinyo,” kato Barlian mangecek-ngecek surang.

Dalam kaadaan Barlian galau kecek urang kini, badariang hape tando we-a masuak. Tabik subangek baliak. Barlian maraso pasan we-a ko pasti dari Nurlela.

Dibukak hape, dicaliak pasan we-a. Bakaruiklah kaniang Barlian. Nomor we-a indak dikenal. Batambah galaulah si Barlian.

“Nurlela, lah bailang-an nomor we-a Uda Barlian agaknyo mah yo,” kato Barlian mangecek-ngecek surang jo kaadaan jatuah ka dalam aia mato.

Susah diri ditangguang surang di rantau urang. Kasiapolah susah jo sadiah kadicarito-an. Dalam tamanuang-manuang surang, dicaliak juolah pasan we-a nantun dek Barlian.

“Uda, ini dari pelanggan Uda kemarin. Maaf ya Uda, pagi-pagi adik sudah mengganggu waktu istirahat Uda.”

Dek mambaco pasan we-a tu, tabik sumangek Barlian bantuak amper oto langsuang ka angko saratui. Tabayang anak gadih kapatang tinggi samampai saroman bana jo Nurlela.

“Ya Dik, apa kabar? Apakah ada yang bisa Uda bantu?” bunyi baleh pasan we-a Barlian.

“Uda, nama adik adalah Dewi Rahmi. Teman-teman biasanya memanggil Dewi. Tapi untuk komunikasi kita, Uda panggil saja adik Rahmi ya. Biarlah panggilan Rahmi itu khusus untuk Uda ya,” baleh anak gadih tu.

Dek mambaco pasan jo pakai panggilan khusus saumpamo lah malayang-layang ka sarugo pangana Balian.

“Baiklah Dik Dewi, eh maaf Dik Rahmi maksud Uda. Apakah Dik Rahmi perlu bantuan Uda?” tulih Barlian dalam we-a tu jo gadang ati nan sadang basumangek bana.

“Iya Uda. Maaf Uda, nama Uda siapa ya? Agar Dik Rahmi mudah berkomunikasi,” baleh Si Rahmi tu.

“Panggil saja Uda Barlian. Nama Uda adalah Barlian, anak dagang atau perantau dari Banda Sapuluah tanah Minangkabau,” tulih Barlian lengkap-lengkap.

“Baiklah Uda Barlian. Dik Rahmi perlu sekali bantuan Uda ya. Masalahnya Dik Rahmi akan meneliti ‘Budaya Merantau dan Berdagang Orang Minangkabau sebagai Penggerak Ekonomi Kerakyatan’ Uda. Itu sebagai tugas akhir Dik Rahmi di Universitas, Uda,” tulih Dik Rahmi.

Amboiiii. Pucuak dicinto ulam tibo. Basarobok sarjana samo calon sarjana. Baitulah kini pangana Barlian lulusan Jurusan Ekonomi dari Padang nan sadang malayang-layang bantuak langsuang ka sarugo. Sadang dapek angin bana layang-layang Uda Barlian.

“Sudah dulu ya Uda. Besok pagi Uda, Dik Rahmi ganggu lagi ya. Soalnya Dik Rahmi segera berangkat ke kampus menemui dosen pembimbing,” pasan we-a Dik Rahmi.

Ondeh mandeh. Indak tangguang gadang ati Barlian. Ibaraik mato nan sadang takantuak bana, banta tibo dianta-an anak gadih. Indak tantulai pangana Barlian, dibukaknyo jendela kamar kos, kironya matoari alah tenggi. (Bersambung)

286 Total Dibaca 1 Dibaca hari ini
Share

Komentar

Previous Image
Next Image

info heading

info content

Be the first to comment

Leave a Reply

Alamat email Anda tidak akan dipublikasikan.


*