“RINDU BANDA SAPULUAH”

BAB 10

RUMAH TAGADAI, NURLELA MAKIN SANSARO

Episode (24)

Karim Mulai Licik Mambayia Angsuran Utang, Nurlela Sakik Kapalo

“Kalau bautang mambali oto maha bantuak itu, itu namonyo mintuo lah samo tea sajo jo minantu mah,” kecek urang kampuang di kadai. “Angsuran utang ka bank jaleh sajo gadang. Samo kito caliak bisuak, pastilah babayia juo utang mah dek Ripai atau Karim tu,” kato urang kampuang di kadai mampakecek-an minantu jo mintuo tu.

“Samo kito caliak bisuak akibatnyo, kalau indak gilo salah surang, bisa juo marem tagak sajo angoknyo salah surang,” kato urang kampuang di dalam kadai.

“Bara kiro-kiro utang untuak mambali oto maha tu dan baraloh kiro-kiro angsurannyo tiok bulan tu?” kecek laki-laki lain di kadai tu.

“Pakiroan ambo, pasti utangnyo Ripai tu indak kurang ampek ratui juta. Kalau sapuluah tahun, angsuran tiok bulan indak kurang dari tujuah juta. Tu jaminannyo pasti sertipikat rumah Amak Nurlela jo tanah parak di balakang rumahnyo tu,” kecek laki-laki nan lain pulo di dalam kadai nantun.

Apo nan dipakecek-an urang kampuang tu, tabuktilah di bulan partamo. Ripai nan bautang lah mulai manunggak. Karim sabagai minantu nan bajanji mambayia angsuran bulanan, tanyato alun bisa mambayia angsuran. Bantuak-bantuaknyo bukan indak bisa mambayia, tapi ado niat jahat untuak indak namua mambayia.

Dicuboloh dicaliak-caliak, dipandang-pandang parangai Si Karim ko. Bantuak-bantuaknyo, minantu anggota DPRD ko lah bapolitik pulo ka mintuonyo. Karim lah mulai bakilik-kilik loh untuak indak namua mambayia utang. Batambah sakik kapalo Ripai. Nurlea lah lamo manahan ati mahadapi parangai lakinyo. Akibaiknyo kini, Nurlela lah bantuak karakok di ateh batu, mati sagan iduik indak namuah, kurui karempiang.

***

“Uda Karim, tabik ragu Lela sabagai bini. Bulan partamo sajo awak lah manunggak mambayia angsuran. Lai indak ka sangsaro iduik awak ko bisuak Uda?” tanyo Nurlela dalam ragu ka lakinyo Si Karim.

“Lela, kalau urusan mambali oto iyo urusan Uda. Tapi supayo Lela tau sajo, kalau tantang urusan mautang pitih ka bank jo angsurannyo iyo bukan urusan Uda,” jawek Karim nan lah mulai agak mailak sarato mulai manampak-an liciknyo.

“Apo mukasuik Uda tu Uda oi? Batambah binguang Lela tantang mukasuik Uda tu. Jadi soal mautang pitih ka bank tu manjadi urusan sia lai tu?” tanyo Nurlela sambia mauruik dado manahan ati.

“Jaan bantuak indak tau loh kau Lela. Iyo tantulah urusan Abak kau tu nyo,” jawek Si Karim.

Mandanga lakinyo mangecek-an kau tu ka Lela, manggalagaklah rasonyo jantuang Nurlela. Raso mulai kiramaiklah rumah tanggonyo. Ka ulu ati, raso sakiknyo dek Nurlela karano dikecek-an kau tu dek lakinyo.

“Apo kecek Uda? Uda nan manyuruah Abak bautang, kini Abak loh Uda suruah mambayia Utang? Iyo cadiak Uda yo. Bapandia-an Abak Lela yo Uda. Kini Uda nan maoyak-oyak oto rancak tu kaniak kaniin,” kecek Nurlela jo suaro nan mulai kareh sarato jo tangih. “Iyo manyasa bana Lela balaki jo Uda mah. Kalau baitu, rancak Uda caraian sajolah Lela lai dek Uda,” kecek Lela sarato jo tangih sambia lari mambaok rawuangan nantun ka dalam biliak.

Tibo di dalam biliak nyo bae maratok sajadi-jadinyo dek Nurlela. Karim batambah inyo tagak-an mantaginyo sarupo urang hebat sarato maraso indak basalah saketek juo. Karim tatap maraso barado di nan manang dalam bapolitik jo mintuo sarato jo bininyo. (Bersambung)

213 Total Dibaca 2 Dibaca hari ini
Share

Komentar

Previous Image
Next Image

info heading

info content

Be the first to comment

Leave a Reply

Alamat email Anda tidak akan dipublikasikan.


*