“RINDU BANDA SAPULUAH”

Novel Rindu Banda Sapuluah.
Novel Rindu Banda Sapuluah.

BAB 10

RUMAH TAGADAI, NURLELA MAKIN SANSARO

Episode (23)

Untuak Malagak Barlian, Abak Lela Diumbuak Karim Mambali Oto

Di Banda Sapuluah, tapeknyo di sakitaran Bukik Batu Gunuang Nago, sajak babaliak dari Surabaya Si Karim yo sabana angek atinyo. Kadang-kadang bantuak baruak dipantak karanggo, garuik-garuik gapai atinyo nak malawan lagak Barlian isuak kok jadi tibo di Banda Sapuluah ko. Untuak itulah Si Karim bausao maumbuak Mintuo atau Abak Nurlela supayo nio mautang pitih ka bank untuak mambali oto nan agak rancak bantuak oto fortuner atau sakelasnyo. Caronyo adolah manggunoan sertipikat rumah mintuo tampek tingga kini ka bank di Banda Sapuluah.

Dalam utak Si Karim adolah diutang pitih ampek ratui juta di bank, rasonyo lah cukuik untuak mambali oto rancak. Pokoknyo, sajak mulai mancalon jadi anggota DPRD sarato kampanye sampai lah manjadi anggota DPRD bana, Si Karim tatap maakali Pak Ripai atau mintuo ko supayo dapek mamintak pitih. Si Karim paham bana jo Pak Ripai, bialah harato abih asa dapek minantu bapangkek bantuak dirinyo dari pado Barlian nan indak jaleh pangkeknyo salain panggaleh kaki limo.

“Abak, Karim paralu manyampaian nan bana ka Abak tantang apo nan tajadi di Surabaya patang ma,” kecek Si Karim.

Karano tadanga dek Nurlela, tibo-tibo Nurlela capek mandakek sarato langsuang duduak dakek abaknyo. Nurlela paham bana, kalau bantuak itu caro mangecek lakinyo, tantu alamat lah kamanyanduak piti Abaknyo nan bakabek atau manyanduak ameh Abaknyo nan babungka.

“Apo mukasuik Karim tu? Alun jaleh dek abak do,” tanyo mintuo nantun.

“Abak, tanyato Barlian kini lah di Surabaya. Kironyo rantau lah inyo pajauah sajak abak berangi dulu,” kecek Si Karim. Dek mandanga informasi tu, Pak Ripai langsuang takajuik. Pikiran Nurlela langsuang pulo malalangbuana ka Uda Barlian nan denai cinto tu.

“Iyo sabananyo tu Karim? Lai manggaleh kaki limo juonyo di Surabaya tu kan?” tanyo Pak Ripai.

“Itulah nan paralu, Karim kecekan ka Abak,” kecek Si Karim.

“Apo mukasuik Karim tu. Jaleh-jaleh sajolah sampai-an ka Abak ah,” mintak Pak Ripai.

“Bak, tanyato Barlian kini lah kayo rayo di Surabaya. Barlian lah manjadi urang gadangnyo. Inyo lah manjadi manejer perusahaan di Surabaya tu. Mungkin dalam waktu dakek inyo ka pulang ka Banda Sapuluah ko ka mambuek resort jo hotel di Kawasan Mandeh. Mangkonyo, kito paralu mambali oto nan agak rancak untuak manutuik malu Abak di hadapan Barlian isuak,” kecek Karim maumbuak mintuo tu. Kaniang Nurlela langsuang bakaruik mandanga pamintaan lakinyo nantun.

“Batua kalau baitu. Malu abak harus ditutuik. Karim harus capek mambali oto nan rancak tando lai berhasil manjadi anggota DPRD di Banda Sapuluah ko. Tapi baa aka awak untuak mandapek-an pitinyo Karim?” tanyo Abak Nurlela. Si Nurlela geliang-geliang kapalo tando heran karano manuruik-an ati nan busuak sarato indak satuju saketek juo.

“Mudah bana caronyo Bak. Sertipikat rumah awakko, kito jadikan jaminan utang kredit di bank Banda Sapuluah. Kito utang pitih sakitar ampek ratui juta. Untuak maurus ka bank, bia Karim nan mandanga-an Abak isuak,” umbuak Si Karim.

“Jadi, iyo rancak bana bak nantun. Kalau baitu, bisuak pagi awak harus barangkek ka bank. Kalau awak indak capek mambali oto rancak, kamano malu abak ka disuruak-an. Kalau isuak piti lah dapek, awak langsuang mambali oto ka Padang,” jawek Abak Nurlela.

***

Oto baru nan bamerek fortuner sarato cat nan mangkilek lah masuak ka daerah Bukik Batu Gunuang Nago. Karim lah mambaok oto rancak tu sarato manunjuak-an lubang iduang nan gadang. Pak Ripai duduak di kurusi muko di sampiang Si Karim jo ati nan sanang karano indak ado ka mahadang malu lai kutiko Barlian isuak pulang.

Urang kampuang di sakitaran Bukik Batu Gunuang Nago mancaliak tapango kapado oto rancak nantun. Sabagian urang kampuang tu yakin bana bahaso oto tu pasti dibali jo piti utang ka bank di Banda Sapuluah. Tapi indak lamo sasudah itu, mulai pulo urang kampuang bagaroso posoh mampakecek-an Minantu jo Mintuo tu mambali oto jo caro menggadai-an sertipikat rumah induak Nurlela.

Itulah pakaro nan maeboh-an urang kampuang Bukik Batu Gunuang Nago. Rumah di tanah pusako nan punyo sertipikat atas namo Amak Nurlela alah digadai-an dek laki Amak Nurlela jo minantu baduo. Itulah nan sadang heboh dipakecek-an urang kampuang nan mambuek sakik kapalo Nurlela jo Amaknyo. Sacaro Adat, itu tantulah indak patuik, apolai Amak Nurlela indak pai mautang pitih ka bank nantun. Mamak Nurlela lah mulai pulo kasak-kusuak mampakaro-an pakaro nantun. (Bersambung)

437 Total Dibaca 1 Dibaca hari ini
Share

Komentar

Previous Image
Next Image

info heading

info content

Be the first to comment

Leave a Reply

Alamat email Anda tidak akan dipublikasikan.


*