“RINDU BANDA SAPULUAH”

BAB 9

RINDU PAK DERMAWAN NAN INDAK BAKASUDAHAN

Episode (22)

Menahan Rindu Nan Tak Bakasudahan

Rindu ka kampuang Banda Sapuluah nan indak bakasudahan lah batumpuak-tumpuak dalam diri Pak Dermawan S. Raso ka bacari jalan pulang, raso ka baturuik rumah mande kanduang. Tapi jalan pulang tu bana nan lah kabua, rumah mande kanduang tu bana nan indak jaleh. Tapaso batahun-tahun ba ibo ati. Dek rindu ka kampuang nan lah barek, untuang kok kakak jo adiak padusi nan lai masih ado. Itulah tando tanyo sampai kini.

Dek karano nan bakarano itulah, bapanggia Barlian hanyo lai, nak menumpahan rindu ka Banda Sapuluah nan indak bakasudahan nantun.

“Assalamualaikum Papi,” kecek Barlian nan baru datang pado Sabtu malam. Indak lamo Dik Rahmi tibo sarato duduak di sampiang Papinyo.

“Alaikumsalam Nak Barlian. Silahkan duduk,” kecek Papi dalam kondisi haru jo rindu sarato dalam ibo ati nan indak tatahankan.

“Maaf Papi. Apakah Papi masih bisa berbahasa Minang? Kalau bisa menggunakannya tentu lebih baik agar rindu papi kepada kampung bisa dilepaskan,” kecek Barlian.

“Barlian, Papi tantu masih bisa. Jadi rancaklah Papi pakai bahaso Minang” baleh Papi Dik Rahmi. Anak kasayangan nan sibiran tulang, anak tungga babeliang nantun hanyo tapurangah mandangaan bahaso Minang.

“Maaf Papi, huruf S di balakang namo Papi batua tu singkatan dari kato Sikumbang?” tanyo Barlian.

“Batua Nak Barlian,” jawek Papi.

“Kalau baitu, labiah rancak Barlian mamanggia Mamak sajo, Pi. Kebetulan pulo suku Barlian adolah sikumbang. Apolai dalam iduik Barlian di kampuang indak pulo punyo Mamak. Jadi, lah batahun-tahun pulo Barlian nak mancari Mamak. Kalau Papi lai indak kabaratan, Barlian rancak mamanggiah Mamak sajo. Baitu kito pakai dalam adat,” pintak Barlian.

“Alhamdulillah. Indak baado kamanakan. Ciek ko sajo lah mulai rasonyo lapeh rindu Mamak ka kampuang Banda Sapuluah,” kecek Mamak Dermawan S.

“Barlian, Mamak sangajo mamanggia Barlian kasiko, bahaso Mamak rindu bana ka kampuang. Hanyo sajo dek Mamak iyo indak tantu lai jalan pulang, indak tantu lai jajak kampuang nan ka dituruik, indak tantu lai rumah uni atau rumah adiak nan ka dicari. Jadi kabua bana kampuang nan ka dijalang. Tapi rindu Mamak nan indak bakasudahan lah manumpuak-numpuak. Dek karano itu, kutiko kito ka mancaliak tanah untuak hotel jo resort di kawasan Mande isuak, kito cari-cari jajak kampuang Mamak. Kalau kok untuang tantu batamu,” pintak Mamak Dermawan.

“Lai masih takana dek Mamak namo kampuang Mamak tu,” tanyo Barlian.

Lamo Mamak tu tamanuang. Takana baliak parasaian iduik wakatu ketek. Batigo adiak-baradiak ditinggahan ayah jo mandeh nan maningga dek panyakik muntah bocor. Pak Dermawan nan nomor duo diapik kakak jo adiak padusi. Itu nan masih tabayang dek Mamak nangko.

“Pokoknyo kampuang Mamak tu sasudah Bukik Pulai di sakitaran Bukik Batu Gunuang Nago. Tapi kalau Mamak datang ka situ, Mamak bisa manunjukan kiro-kiro rumah asa Mamak,” kecek Mamak Dermawan.

“Kalau bak nantun, Barlian bisa manunjuak-an arah kampuang Mamak atau satidaknyo kito bisa batanyo ka urang tuo-tuo di sakitaran kampuang Bukik Batu Gunuang Nago nantun,” jawek Barlian.

Dek panjalehan nan agak pasti dari Barlian tu, samakin sananglah ati Mamak nangko. Rindu nan indak tatahan sarato indak bakasudahan salamoko ka Banda Sapuluah lah taraso agak lapeh. Walaupun di tanah rantau Kota Surabaya, Mamak Dermawan lah maraso punyo kamanakan bana si Barlian. Baitu pulo dek Barlian lah maraso punyo Mamak bana yaitu Mamak Dermawan. Sacaro adat, lah tapek bana bantuak rindu mamak jo kamanakan nan sabananyo. (Bersambung)

562 Total Dibaca 1 Dibaca hari ini
Share

Komentar

Previous Image
Next Image

info heading

info content

Be the first to comment

Leave a Reply

Alamat email Anda tidak akan dipublikasikan.


*