“RINDU BANDA SAPULUAH”

Episode (20)

Karim jo Barlian Samo Malu Muko Basobok di Surabaya

Pado hari Senin nan lah mulai sanjo, matoari pun lah mulai maningga-an bumi Kota Surabaya. Kalam lah mandakok maantakan malam. Samantaro angin sanjo mulai manarajang Kota Pahlawan sarato maanta-an suhu nan dingin. Indak lamo sasudah tu, kutiko lah tibo wakatu mugarik, Barlian indak lupo manunai-an sumbayang. Sumbayang alah salasai, sasuai jo janji nan dibuek siang tadi sarato jo instruksi Pak Dermawan S, pemilik perusahaan, Barlian manunggu Dik Rahmi pai ka hotel untuak acara nan paralu bana demi pengembangan perusahaan.

Sambia manunggu Dik Rahmi, Barlian agak tapurangah saketek. Ado ragu di dalam pikiran Barlian. Karano makan malam beko adolah acara panutupan batamu muko antaro pengusaha Kota Surabaya jo anggota DPRD dari Banda Sapuluah, ranah Minangkabau. Dek karano itu, Barlian yakin bana pastilah baeko ka batamu muko nan indak ka bisa dielak-an lai jo Karim. Karim oh iyo Si Karim nan marupo-an salah surang rombongan nantun.

Iyo pastilah ado Si Karim sabab babarapo ari belakangan, Nurlela lah mangecek-an bahasa lakinyo tu sadang kunjungan kerja ka Surabaya. Si Karim adolah konco arek lawan karehnyo sajak ketek. Tapi sayang saribu kali sayang, Si Karim adolah kawan nan mangguntiang dalam lipatan, kawan nan manohok kawan sairiang. Masih taraso sakik ati dek Barlian, Si Karim maambiak Nurlela manjadi bininyo. Sampai taputiah pun tulang Si Karim tu dalam kuburan, nan Barlian indak ka bisa mamaafannyo. Itulah pikiran Barlian dek sakik bana atinyo sampai kini. Tapi baa ka aka Si Barlian lai, patamuan ko jaleh sajo indak ka bisa dielak-an. Lamolah tamanuang Barlian mamikiannyo.

***

Ruangan patamuan hotel lah panuah dek pengusaha Kota Surabaya tautamo pengusaha nan badarah Minangkabau. Di babarapo meja tampak pulo lah duduak tamu nan terhormat anggota DPRD dari Banda Sapuluah. Tampaknyo gagah bana penampilan anggota dewan nan terhormat tu. Malam ko, Barlian jo Dik Rahmi lah masuak ka ruangan patamuan manuju meja Pak Dermawan S, sasuai jo instruksi Pak Dermawan siang tadi di kantua.

Protokol acara bantuak sangajo manunggu Barlian jo Dik Rahmi, sabab babarapo datik sasudah tu langsuang dimulai acara panutupan. Dalam agak-agak, siang tadi lah tajadi banyak putusan nan dibuek. Nan indak abis pikia adolah, baa mangko Papi Dik Rahmi mangharus-an bana Barlian jo Si Rahmi hadir dalam acara panutupan ko. Ikolah nan tapikia-pikia dek Barlian sajak tadi.

Indak jauh dari meja Barlian duduak, tampak bana Si Karim sadang tacaliak maadok bana. Tasirok darah di dado kaduonyo. Pandangan basirobok bana. Takajuik malah kaduonya, batamu di malam nan indak disangko-sangko, batamu di tampek nan indak takiro. Bantuak malu muko kaduonyo. Tapi nan sabananyo yo sakik bana ati Barlian kini nangko.

Indak lamo sasudah tu, Si Karim wakie anggota rombongan dimintak manyampaian hal pokok putusan patamuan. Mangeceklah Si Karim panjang jo leba. Nan intinyo tantulah maimbau pengusaha nan hadir untuk ikuik maiduik-an dunia parawisata Banda Sapuluah ranah Minangkabau.

“Bapak-bapak dan ibu-ibu pengusaha yang saya hormati,” kecek Si Karim mamulai pidatonyo. “Daerah Banda Sapuluah Sumatera Barat memiliki banyak objek wisata pantai yang menunggu partisipasi Bapak Ibu untuk pengembangannya. Oleh karena keunggulan itulah, Banda Sapuluah kami beri julukan Negeri Seribu Wisata Pantai yang wajib dan harus dikunjungi oleh wisatawan dalam negeri dan wisatawan mancanegara jika berkunjung ke pulau Sumatera. Harapan kami adalah kami mohon partisipasi Bapak Ibu pengusaha dan terutama yang berdarah Minang atau setidaknya Bapak Ibu yang pernah memakan nasi Padang untuk ikut mengembangkan pariwisata daerah kami,” baitu bana panjalehan Si Karim agak saketek baguyon sambia manayang-an foto-foto pantai di sapanjang Banda Sapuluah sajak kawasan Mande sampai kawasan Aia Aji sarato Tapan Indopuro jo Lunang Silaut nan manakjub-an. Barlian tapaso maangguak-angguak bantuak malam mau.

Indak lamo sasudah tu tibo pulo giliran sambutan pengusaha Kota Surabaya nan diwakili oleh Pak Dermawan S.

“Assalamualaikum. Bapak-bapak anggota dewan yang terhormat. Berdasarkan penjelasan Bapak-bapak tentang potensi pariwisata Negeri Banda Sapuluah sejak siang hingga malam ini, perusahaan kami berencana akan ikut berpartisipasi mengembangkan pariwisata di Negeri Bandar Sepuluh,” kecek Bapak Dermawan disambuik tapuak tangan hadirin.

Mandanga keputusan Pak Dermawan sananglah ati anggota DPRD nantun, sajuaklah di dalam kiro-kiro.

“Jika Bapak anggota dewan memfasilitasi, kami bersedia membuat hotel dan resort di kawasan Mandeh yang sudah dijelaskan oleh Pak Karim tadi. Menurut pandangan kami, kawasan Mande punya potensi pariwisata yang cukup baik dan dapat mendongkrak pengembangan pariwisata pantai di sekitarnya. Jika nanti selesai, kami akan mempromosikan pariwisata Banda Sapuluah ke mancanegara,” tambah Pak Dermawan.

“Untuk merealisasikan proyek hotel dan resort itu, kami akan mengutus seorang manejer yakni Barlian, S.E. yang juga calon menantu kami. Kami mohon Bapak Manejer untuk berdiri. Beliau adalah juga putra Negeri Banda Sapuluah. Mudah-mudahan Bapak anggota dewan yang terhormat dapat bekerja sama dengan manejer kami ini,” kecek Pak Dermawan sambia mamacik bahu Barlian nan lah tagak sajak tadi.

Katiko tapuak tangan bagamuruah, tibo-tibo wajah Si Karim barubah manjadi warna merah padam. Bantuak malu muko sarato jo sakik ati mancaliak Barlian. Indak lamo, Si Karim maningga-an tampek duduaknyo bajalan ka arah toilet sarato langsuang ka lua ruangan. (Bersambung)

243 Total Dibaca 1 Dibaca hari ini
Share

Komentar

Previous Image
Next Image

info heading

info content

Be the first to comment

Leave a Reply

Alamat email Anda tidak akan dipublikasikan.


*