“RINDU BANDA SAPULUAH”

Episode (18)

Ratok Nurlela Bak Ratok Tangih Angin Bukik Langkisau

Kutiko masih sadang mandinginkan kapalo karano patui siang ari jo tusukan panah baracun nan dihunjamkan tapek ka dado Barlian dek Sang Manejer pado ari tadi, malam kini Barlian nyo cubo tarui untuak maumbuak diri supayo indak emosi mahadapi suatu keadaan.

“Elok jo bayiak harus dihadapi tarui, jaan dielak-an karano baguno untuak mandewasa-an diri. Jalan iduik ka balanjuik tarui nan indak bisa ka dibaranti-an. Makonyo di dalam iduik kito, kok mujua sapanjang ari, kok malang iyo sakijok mato,” kecek Barlian di dalam ati nan mambuek dirinyo kian tagok mahadapi iduik di rantau nan jauah.

Kutiko malam ko sadang barancana ka manalepon Dik Rahmi di Jakarta, masuaklah panggilan talepon dari nomor hape baru nan alun dikenal dek Barlian.

“Assalamualaikum. Dari siapa ya? Apa kabar?” jawek Barlian.

“Alaikumsalam. Uda Barlian ko dari Lela mah di Banda Sapuluah. Lah pakai bahasa Indonesia Raya loh Uda mangecek kini mah. Pakai bahaso Minang saj0 lah Uda,” jawek Nurlela di subarang talepon tu.

“Eh, Diak Lela kironyo. Baa kok manaleponloh Lela ka Uda malam-malam bantuak iko. Sacaro adat indak rancak kalau tadanga dek laki Lela, sarato Abak jo Amak beko. Apolai kok baliau-baliau tu tau bahaso Lela lah mulai loh manalepon Barlian, kacau baliau beko Banda Sapuluah tu, Lela,” kecek Barlian mangajari nan elok.

“Oh bantuak itu Uda kini lai. Tampaknyo alah Uda itaman bana diri Lela di dalam diri Uda. Saumpamo hape, alah Uda delete bana namo Lela di hape Uda. Kok iyo bantuak tu Uda, sasudah iko indak ka manalepon Uda, Lela lai doh. Iko dek paralu bana mah,” kecek Nurlela saketek mangareh.

“Indak bantuak itu banaloh mukasuik Uda do Lela. Lai buliah Lela manalepon Uda. Uda indak malarang Lela manalepon doh. Dek karano Lela manalepon di malam ari, itu sumbang namonyo di dalam adat kito. Walau Uda lah iduik di tanah rantau, Uda tatap paham masalah adat kito. Baeko, sacaro adat, Uda bisa dituduah malangga adat. Uda bisa dituduah manggaduah bini urang nan sadang balaki. Itu dilarang bana di dalam adat jo ugamo kito ma Lela,” kecek Barlian.

“Tolong danga bana parasaian Lela agak sabanta dek Uda. Mohon bana ka Uda. Mambana Lela sabaleh jo kapalo ka dakek Uda, untuang salagi Uda Karim pai ka Surabaya untuak kunjungan kerja,” pintak Nurlela sahinggo rarak loh ati Barlian untuak mandanga parasaian Nurlela.

“Kok baitu jadilah. Apo kaba nan patuik Lela caritoan ka Uda tu,” umbuak Barlian.

“Supayo Uda tau sajo. Dangalah ratok tangih jo parasaian Lela nan bantuak ratok tangih angin Bukik Langkisau di pantai carocok ko dek Uda. Sajak Lela manikah pado ari kaampek ari rayo sarato Uda maninggaan kampuang tu, makin marasai raso ati Lela. Saroman buruang batino di dalam sangkak sajo, mato lapeh tapi badan takuruang. Apolai sulik bana Lela mancintoi Uda Karim dek karano memang indak Lela cintoi sajak saisuak. Tantu ka babeda bana jadinyo, kalau Lela dulu manikah jo Uda Barlian. Kini rasonyo marasai bana badan jo parasaan Lela. Jadi kok Uda caliak badan Lela kini, mungkin bisa manangi Uda salamo tujuah ari tujuah malam dek nyo. Ciek lai nan paralu bana Uda kana adolah bahaso cinto Lela ka Uda indak ka pernah ilang di dalam diri denai ko do Uda,” kecek Lela.

“Oh baitu, iyo molah,” jawek Barlian.

“Uda jaweklah agak panjang. Jawek Uda hanyo iyo-iyo molah sajo. Oh jadi dek Uda lah berhasil di Betawi tu, Uda lah lupo sajo jo Lela lai yo. Lela lai mancaliak foto-foto Uda di pacebuk tu mah. Uda lah berhasil kini, lah pakai dasi di kantua Uda nan batingkek tu. Tampakloh dek Lela, baju jo sarawa nan Uda pakai nan mangkilek. Tantu sajolah kini rekening jo dompet Uda lah samakin padek. Mancaliak kaberhasilan Uda tu di pacebuk Uda, manyasa rasonyo Lela dipalakian Abak jo Uda Karim,” kecek Nurlela bantuak manyasali iduiknyo.

“Ah iyolah. Kan alah lapeh kasado nan kadisabuik Lela kan? Lela nan paralu kito ingek adolah jodoh, maut, jo rasaki alah ditantu-an Allah sajak dahulunyo. Jodoh jo rasaki nan untuak awak pasti indak ka baraliah ka urang lain. Sabaliaknyo, jodoh jo rasaki urang pasti indak bisa baraliah ka awak doh. Jadi, kalau saumpamo isuak kito bajodoh baliak sasuai jo katantuan Allah, pastilah indak dapek kito ilak-an. Indak dapek samaso gadih, baranak ampek manjadi bini juo. Dek ari lah tambah malam, sahinggo itu dulu yo Diak Lela. Mari kito lalok dulu. Assalamualaikum,” tutuik Barlian. (Bersambung)

67 Total Dibaca 1 Dibaca hari ini
Share

Komentar

Previous Image
Next Image

Be the first to comment

Leave a Reply

Alamat email Anda tidak akan dipublikasikan.


*