“RINDU BANDA SAPULUAH”

BAB 7

TAMPILAN BARLIAN MANGKILEK, NURLELA MARATOK IBO

Episode (17)

Tampilan Lah Mangkilek, Agaknyo Rindu Ado Nan Maambek

Indak dirantang curito panjang bana, elok dipunta nak nyo singkek. Alah labiah anam bulan, Barlian bakarajo jo tampilan nan mangkilek. Baju rapi saratok dasi nan lakek. Sarawa mangkilek jo sipatu rancak agak mambulek. Nan labiah mambuek ati Barlian sanang adolah gaji tiok bulan lancar lai indak sandek sahinggo rekening jo dompet Barlian kini lah batambah padek.

Kok diukua-ukua jo dijangko, dibandiang-bandiang lagak nan jo gaya Barlian jo Karim baduo, tantulah jauah tingga Si Karim. Walaupun Si Karim tu alah manjadi anggota DPRD di Banda Sapuluah, Negeri Seribu Wisata Pantai di ranah Minangkabau. Jikok Nurlela sempatloh mancaliak kaadaan iduik jo rono sarato gaya panampilan Barlian nan mangkilek sarato dompetnyo nan alah padek, diagak-agak tantulah Nurlela bisa jadi mamintak carai ka lakinyo Si Karim kini juo. Apolai Pak Rifa’i, Abak Nurlela tu nan sagalo hal diukuanyo jo harato, kok sempat mancaliak kaberhasilan iduik Barlian di nagari rantau pastilah akan takluk atau manyarah sajo lai di tangan Barlian.

Tumpak kapado Si Barlian, kalau dicaliak-caliak bana, rasonyo sampai kini, Barlian tataplah Si Barlian bantuak nan daulunyo. Indak barubah dari sikap jo parangainyo. Barlian tataplah Barlian nan randah ati. Sumbayang indak tingga, mangaji tarui tiok sasudah sumbayang. Dicaliak dari caro basikap jo bakurenah, Barlian adolah urang nan lai hormat ka atasan sarato malindungi kasado bawahannyo.

Siang kini, kok dicaliak-caliak jauah lah badagok bana duduak Barlian. Lah coga pulo dan lah mulai patuik pulo kok diangkek manjadi manejer atau satidaknyo wakil manejer. Apolai Dik Rahmi nan tingga manunggu wisuda lah manalepon jo magiah angin sarugo untuak ka maangkek Barlian manjadi wakil manejer di perusahaan Papinyo ko.

Namun samantang pun baitu, sajak duo bulan nan kudian ko, agak lain pandangan Mas Sudarso nan marupokan manejer di tampek karajo kini. Dari kawan-kawan Barlian, inyo dapek-an informasi bahaso Mas Darso adolah calon laki dari Dik Rahmi nan dipiliah-an dek maminyo. Mas Darso adolah anak pulo dari sahabat dakek Mami Dik Rahmi. Dari kaba buruang nan dapek dari carito karyawan, ado hal nan manguntuang-an Barlian adolah bahaso salamoko Dik Rahmi indak suko jo Mas Darso. Apolai papi Dik Rahmi, tanyato indak satuju saketek juo Dik Rahmi dijodoh-an jo Mas Darso.

Patuiklah salamoko satiok Barlian manarimo telepon dari Dik Rahmi, Pak Sudarso tarui curiga ka Barlian. Lain bana bantuak manejer tu. Kadang-kadang bantuak tapijak samuik gata lai pulo tingkah sang manejer tu. Curiga indak manantu sajo inyo ka Barlian. Apolai kapatangko, Pak Darso berang bana ka Barlian saromanko.

“Mas Barlian, mohon maaf ya. Mohon Mas Barlian tidak terlalu sering menerima telepon dari Dik Rahmi ya. Mohon sekali Mas. Asal Mas Barlian tahu saja ya bahwa Dik Rahmi sudah dijodohkan oleh maminya dengan manejer di perusahaan ini. Mas Barlian sudah tahu kan siapa manejer tersebut? Untuk itu mohon sekali Mas, agar mas tidak menjadi penghalang bagi jodoh saya dengan Dik Rahmi. Apalagi sebentar lagi Dik Rahmi akan wisuda dan artinya tidak lama lagi tentu kami akan segera menikah,” jelas Pak Sudarso seorang manejer kepada stafnya yakni Barlian.

“Baiklah Pak. Saya memakluminya Pak,” kecek Barlian manunduak kuyu.

Dek kanai tendangan dua baleh pas itu, balinanglah aia mato Barlian. Agak taibo ati Barlian. Apolai informasi nan bantuak patui di tangah ari ko dapek bana dari tangan partamo. Bantuak disaik jo sambilu sarato diagiah aia asam ati Barlian kini. Ramuak bana nan indak takiro ati Barlian. Hal nan kini sadang disasali Barlian adolah Dik Rahmi indak ado manyabuik saketek juo tantang hubungannyo jo Pak Sudarso.  

Kini nyo cubo mananang-an atinyo dek Barlian nan sadang takucak-kucak dek Pak Sudarso. Sakiro nan lah agak tanang, barulah Barlian ka manalepon Dik Rahmi baliak untuak mandapek-an informasi nan sabananyo. Rancak bantuak itu, barundiang harus dalam kaadaan jauah dari emosi. Dalam agak-agaknyo, Barlian kini iyolah pandai sarato bijak bana dalam batindak. Alah tampak bana dewasanyo Barlian kini. (Bersambung)

[tribulant_slideshow gallery_id=”3″]

Be the first to comment

Leave a Reply

Alamat email Anda tidak akan dipublikasikan.


*