“RINDU BANDA SAPULAUH”

Episode (9)

Nurlela Mamintak Barlian Capek Pulang

Sajak dipaso Abaknyo tigo ari nan lalu, sampai Nurlela labiah banyak bakuruang di dalam biliak. Taibo bana ati Nurlela agaknyo. Apolai, sahari sasudah dipaso Abaknyo atau labiah tapeknyo duo ari nan lalu, Ayah jo Amak Karim sarato dunsanaknyo lah datang marundiang-an ari kabaralek. Rundingan lah dibuek. Tantang rundingan nantun, kok bulek lah dapek digolong-an, kok pipih lah dapek pulo dilayangkan. Saumpamo itulah kasapakatan nan alah dibuek. Jatuahnyo ari kabaralek adolah ari kaampek ari rayo sasuai pulo jo tanggal 4 Syawal.

Dek karano nan bakarano itulah, badan Nurlela nan indak lamak lai. Sumangek alah ilang. Badan lah mulai mandamam. Pikiran panjang tantang apo nan ka tajadi di badan diri. Tapikia bana nan indak katabayang-an iduik balaki jo laki-laki nan indak dicintoi sekatek pun juo.

Dalam kaadaan kapalo Nurlela nan sadang barek bana bakuruang di dalam biliak; saumpamo baban barek sangguluang batu, takana pulo nan bana untuak mawe-a Uda Barlian di tanah Betawi. Saindaknyo, ado usao taakhir untuak maagiah kaba ka Uda Barlian tantang kaadan nan sabananyo tajadi. Nurlela mamohon ka Uda Barlian untuak capek pulang ka Banda Sapuluah untuang kok lai pikiran Abak ka barubah.

“Uda Barlian.”

“Uda…. “

“Uda…. “

Lah tigo kali Nurlela mawe-a, namun balasan alun ado juo walau nan pasan alah tampak dibaco dek Uda Barlian. Ampia pulo putui aso Nurlela nantun dek karano tampek bagantuang nan diarok agaknyo alah putui pulo.

Untuanglah indak lamo dalam putui aso nantun, baru babaleh we-a Nurlela dek Barlian.

“Iyo Diak Lela. Uda iyo lah rindu pulo ka Lela. Mudah-mudahan dalam babarapo ari lai Uda pulang. Kapatang Uda lah bajanji baliak jo Uda Tamburin supir oto truk tu. Iyo jo truk juo Uda ka manumpang karano iyo indak tabali tiket kapatabang dek Uda do Lela. Haraplah maklum Lela tantang itu,” baleh bunyi pasan we-a Barlian nan diinokmanuang-an bana isinyo dek Nurlela.

“Uda, nan paralu bana Lela sampai-an adolah pakaro nan sadang rumik Lela adoi. Pakaro nan sadang rumik tu adolah Lela jadi juo ka dipalakian jo Uda Karim. Wakatu nikah jo baralek alah dirundiang-an Abak jo Amak sarato dunsanak pado tanggal ampek syawal atau pado ari kaampek rayo. Samantaro di ati Lela, indak ado saketek juo cinto Lela ka Uda Karim. Nan sabananyo di ati ketek Lela, apopun nan katajadi, bialah cinto Lela ka Uda Barlian, Lela baok sampai mati. Kalau memang bantuak itu lo nan ka manjadi nasib Lela salamo iduik nangko,” baleh Lela diwe-a tu.

“Cinto Uda ka Lela jaanlah Lela ragu-an. Tapi iyo agak rumik Uda mangecek-an. Nan taraso jo nan tapikia dek Uda, iyo lah malang nasib Uda nan Abak jo Amak alah tiado. Apolai adiak Amak Uda nan surang banamo Etek Mani di kampuang adolah iyo urang bansaik. Aratinyo kaluarga Uda di kampuang indaklah urang tapandang sarato bansaik pulo. Kaadaan itulah agaknyo nan mancubo mararak-an cinto awak baduo. Tapi paralu bana Lela katahui, cinto Uda ka Lela indak akan bisa rarak atau bialah Uda baok sampai mati isuak. Babarapo ari lai Uda ka pulang, apo pun nan tajadi di badan Lela, baju duo patagak ko tatap Uda anta-an untuak Lela,” baleh Barlian Baibo ati.        

“Ado ciek lai nan Lela sampai-an ka Uda. Saumpamo, Lela isuak indak ado mawe-a Uda lai, itu baarti hape adiak nan Lela pakai ko lah diambiak Abak. Kalau nantun nan tajadi, Lela ka tatap tarui bakomunikasi dalam batin sajo jo Uda Barlian lai,” baleh Nurlela dalam tangih nan mandalam sadang bakuruang di dalam biliak. (Bersambung)

310 Total Dibaca 1 Dibaca hari ini
Share

Komentar

Previous Image
Next Image

info heading

info content

Be the first to comment

Leave a Reply

Alamat email Anda tidak akan dipublikasikan.


*